Gikoronahan si Angelica Lopez gikan sa Palawan isip Reina Filipinas Grand International 2026 sa unang grand coronation night sa pageant, kagabie.
Si Lopez ang murepresentar sa Pilipinas sa Miss Grand International 2026, kapuli ni Emma Mary Tiglao.
Si Lopez nakadaog batok sa 20 pa ka kandidata gikan sa lain-laing dapit sa nasud.
Giila si Cleopatra Barrera sa Zambales ang first runner-up, samtang Isabella Ortega sa Camarines Sur ang second runner-up.
Si Zeah Nestle Pala sa Mandaluyong ang third runner-up ug si Luisa Benavides sa Caloocan isip fourth runner-up.
Samtang, si Anne Patricia Diaz sa Maynila ug si Alexie Caimoso Brooks sa Iloilo City napili nga representante sa Pilipinas sa sunod edisyon sa MGI All Stars human makadaog sa Reina Filipinas MGI All Stars titles.
Ang mga mananaog gipili base sa gipag-usang puntos gikan sa panel of judges ug boto sa publiko.
Lakip sa mga hurado si Michael Cinco, internationally acclaimed Filipino designer; si CJ Opiaza, Miss Grand International 2024; si Vanessa Pulgarin sa Colombia, inaugural MGI All Stars winner; ug si Nguyen Huong Giang sa Vietnam, first runner-up sa MGI All Stars.
