Gipahungaw sa sikat nga Amerikanong mag-aawit nga si Ariana Grande ang iyang kasuko ngadto sa administrasyon ni Presidente Donald Trump human gigamit ang iyang kanta nga “Bye” sa usa ka video.
Kining maong video gikan sa White House diin nagpakita sa mga ahente sa gobyerno nga nang-aresto ug nag-piring sa mga tawo isip pagpasigarbo sa ilang higpit nga polisiya sa imigrasyon.
Direktang nagbilin og komento si Grande sa maong post diin gitawag niya ang video nga usa ka “barbariko, dili tawhanon, ug ngil-ad nga binuang.”
Tungod niini, giingong ang kampo sa sikat nga pop star nangita na karon og pamaagi aron matangtang dayon ang iyang musika sa maong clip.
Sa pagkakaron, wala pa magpagawas og opisyal nga tubag o pamahayag ang White House bahin sa maong isyu. (riza budlao)
