Hugot nga kooperasyon sa mga ASEAN Members ang yawe aron mahimong hapsay ug malaumbuon ang rehiyon.
Kini ang gibutyag ni Foreign Affairs Secretary Ma. Theresa Lazaro human gihatagan niya’g gimbug-aton ang kahinungdanon sa mas hugot nga kooperasyon tali sa ASEAN, China, Japan, ug South Korea aron tubagon ang nagkalain-laing krisis sa rehiyon.
Matud pa ni Lazaro nga ang nagkataas nga presyo sa pagkaon ug enerhiya, ang pagkabalda sa supply chain, lakip na ang epekto sa pagbag-o sa klima maoy pipila sa mga bug-at nga hagit nga direktang gipas-an sa mga katawhan karon.
Gipasabot sa kalihim nga ang ASEAN Plus Three nagpabilin nga usa ka krusyal nga plataporma alang sa kalinaw, kasiguruhan, ug panaghiusa sa Sidlakang Asya.
Gipahinumdoman usab niya nga ang maong kooperasyon giumol taliwala sa Asian Financial Crisis niadtong 1997, nga nagpamatuod nga ang mga suliran sa rehiyon nagkinahanglan gyud og rehiyonal nga paghiusa.
Gisubli ni Lazaro nga walay bisan usa ka nasod ang makabarog o makasugakod nga mag-inusara taliwala sa dagkong krisis ug hagit sa seguridad.
Alang sa kalihim ang kooperasyon kinahanglang maghatag sa kasiguruhan, kalunsay sa pamatayon, ug konkretong suporta aron dungan nga makabangon ug makalambo ang tibuok rehiyon.
