CAGAYAN DE ORO CITY -Naminusan ang mga armas nga magamit sa nabiling mga rebeldeng New People’s Army o NPA nga padayong nakig-agbat sa tropa sa 58th IB,Philippine Army nga naglihok sa esteng bahin sa Misamis Oriental.
Kini human isulti sa kanhi NPA member nga si Carlito Lindahay alyas Yama ang lokasyon sa M-16 ug AK-47 rifles nga gigamit nila sa pakig-engkuwentro sa mga sundalo sa lalawigan kaniadto.
Namahayag si 58th IB commander Lt Col Leoncito Grezula Jr nga gilayong mihimo sa usa ka team ang iyang tropa aron tultulon ang lokasyon diin gilubong ang maong mga armas.
Dugtong niini,namahayag usab si 4ID commanding general Major General Michel Anayron Jr nga ang pagtug-an ni Yama ang dakong pamatuod nga wala mohunong ang mga sundalo pagkab-ot sa kahusay’g kalinaw alang sa katawhan sa probinsya.
Kini ang rason nga gidani ni Anayron ang gamay’ng nabiling nga NPA rebels nga mitahan na balik sa gobierno ug manginabuhing normal sama sa daghanan sa ilang mga kaubanan nga dugay nang nahatagan sa tabang sa kagamhanan.
Si Lindahay ang giila nga pinaka-edaran ug pinakadugay nga sakop sa NPA sa Misamis Oriental nga nakahukom pag-surender sa gobierno niadtong Marso 3 ning tuiga.
