Gikumpirma sa hepe sa Philippine National Police (PNP) nga anaa pa gihapon sulod sa Pilipinas ang pugante nga si Charlie Atong Ang.
Gihimo ni PNP Chief Police General Jose Melencio Nartatez Jr., ang pahayag bisan paman sa mga migawas nga balita nga naka-ikyas na kini sa nasud.
Namugos si Nartatez nga padayon ang pagsusi sa mga otoridad sa mga tugpahanan aron maberipikar ang taho.
Gipahayag sa opisyal nga dako ang posibilidad nga nagtago-tago pa gihapon si Ang sa nagkalain-laing dapit sa nasud, busa padayon ang masubsub nga pagpaniid ug pagpangita sa mga otoridad aron matag-an ang iyang lokasyon ug madakpan ang wanted nga personalidad nga may patong sa ulo nga P20-Milyon.
Nagpasidaan ang PNP sa bisan kinsang nagtabang o nagatago sa maong suspek nga pwedeng mag-atubang sa bug-at nga kaso sa balaod.
Gitawagan ni Nartatez ang publiko nga makigtambayayong sa paghatag impormasyon sa pinakaduol nga estasyon sa pulis kon adunay mapuslanong kahibalo bahin sa nahimutangan sa maong indibidwal.
