Gisaysay ni Impeachment Court Spokesperson Atty. Regie Tongol nga ang nahitabong proseso sa trial ni kanhi Chief Justice Renato Corona niadtong 2012 ang mamahimong sumbanan sa korte nga gihawiran sa senado karon.
Gibutyag ni Tongol, nga niadtong panahona, nangayo’g permiso si BIR Commissioner Kim Henares gikan kang kanhi Presidente Noynoy Aquino aron sa pagsumite sa tax records human makadawat sa subpoena gikan sa impeachment court.
Kini nga lakang gihimo aron malikayan ang contempt of court ug aron mapanalipdan usab ang iyang kaugalingon gikan sa posibleng kasong kriminal ubos sa Tax Code.
Gilauman nga hisgutan kini nga pamaagi sa mga senator-judges karong adlawng Lunes alang sa hisgutanang subpoena sa tax records ni Bise Presidente Sara Duterte.
Bahin sa posibilidad nga ipasaka ang isyu ngadto sa Korte Suprema, gitin-aw ni Tongol nga adunay magkaatbang nga baruganan ang mga eksperto sa balaod.
Samtang ang uban nag-ingon nga walay hurisdiksyon ang Korte Suprema tungod kay ang Senado lamang ang adunay gahom sa impeachment, aduna poy nagtuo nga mamahimo kining i-apilar kung mapamatud-an nga adunay pagmamalabis sa gahom o paglapas sa katungod sa tawo ang korte
