Mosulod na sa audit phase karong semanaha ang impeachment trial batok kang Vice President Sara Duterte, diin motestigo ang mga sakop sa Commission on Audit (COA) bahin sa paggamit sa P612.5 milyong confidential funds sa Office of the Vice President ug Department of Education.
Matod ni Tingog Party-list Rep. Jude Acidre, ipasabot sa mga COA witness kung giunsa pag-audit ang maong pondo ug kung ang liquidation ug supporting documents mituman ba sa nalungtad nga mga lagda.
Gilauman nga unang motestigo sila kanhing COA State Auditor Roderick Wamil ug Supervising Auditor Celine May Del Campo, nga sundan ni House Legislative Information Resources Management Department Director Marivic Pareja.
Hisgotan usab sa mga testigo ang direktiba sa COA nga isauli ang P73.287 milyong confidential funds sa OVP ug ang mga giingong iregularidad sa liquidation documents, lakip ang mga acknowledgment receipt nga giingong adunay peke o hinimo-himong mga ngalan.
