Gipadayag ni Bishop Jose Colin Bagaforo, chairman sa CBCP Commission on Inter-Religious Dialogue, nga bukas alang sa tanang sektor sa katilingban ang ilang kalihokan nga White Ribbon March.
Matud pa sa obispo, bisan pa og giimbitar ang mga politiko, wala sila tugoti nga motambong sa programa isip mga mamumulong o makahatag og mensahe sa entablado.
Gipasabot ni Bagaforo nga gihimo nila kini aron masiguro nga nagpabiling nakapokus ang kalihokan sa ilang mga adbokasiya ug dili magamit sa mga politiko alang sa ilang kaugalingong interes o agenda.
Lakip sa ilang gipasiugda ang pagbatok sa korapsyon, ilabina sa gitawag nilang “flood control scandal,” pagsukol sa political dynasty, ug pagduso sa election reform.
Gibutyag usab niya nga ang maong White Ribbon March gitumong aron mahimong tingog sa katawhan ug dili mahimong plataporma alang sa interes sa mga nagkupot sa gahom. (jane abulag)
