CAGAYAN DE ORO CITY – Kasuhan sa ginang nga brgy konsehal sa Misamis Orienal ang iyang kaugalingong bana nga aktong nasapon nga giingong nakig-hilawas sa gitoohang babayeng kabit niini sulod sa lodging house diha sa Brgy Kauswagan sa syudad.
Miingon si Carmen Police Station commander Maj Jelesis Teves nga dili na palabyon sa maong kapikas ang iyang kaugalingong bana dihang nasapon na usab niya kini nga nagbudhi kaniya.
Dugang ni Teves nga mobalik sa ilang buhatan ang biktima aron magpatabang kanila paghan-ay sa kasong concubinage batok sa iyang bana nga opisyal usab sa dakong kompanya nga nakabase sa El Salvador City.
Nasapon ang wala una hinganli nga bana nga nakig-kuyog sa ka-relasyong babaye dihang gibutanga’g ‘global positioning system’ o GPS ang sakyanan nga gisakyan sa duruha rason nga pulos nabalhog sa Maharlika Detention and Rehabilitation Center sa syudad.
Una niini,daw nadala pa sa ospital ang lalaki kay kalit mihuot ang dughan dihang wala magdahom nga nasapnan sila sa kapikas ug kapolisan.
