CAGAYAN DE ORO CITY – Gikompirmar ni Gov Bambi Emano nga may Pinay worker nga naggikan sa usa sa mga lungsod sa Misamis Oriental nga gipaubos sa hospital isolation.
Kini human nasuta nga gikan sa Hong Kong ang maong overseas Filipino worker o OFW nga kabahin sa gipaubos sa temporary ban ang mga tawo nga makasulod dinhi sa nasud.
Miingon si Emano nga ang maong Pinay worker ang bag-uhay pang miabot sa lalawigan gikan Hong Kong hinungdan paspas usab gidalikyatan sa local municipal officials aron madala sa ospital.
Dugang ni Emano nga dili pa angay mabalaka ang publiko kay wala pa’y ilhanan nga nagbaton sa positibo nga sintomas sa nobel corona virus ilabina nga atua pa sa kauluhan ang swab sampling niini.
Una nang gibutyag ni Department of Health Regional Director Dr Adriano Subaan nga lima ka tawo na ang gipaubos sa hospital isolation apan duha na kanila ang nag-negatibo sa sintomas sa bayrus.
