Mupatuman sa gamay nga power rate hike ang Cagayan Electric Power and Light Company, Inc. (CEPALCO) alang sa singil sa kuryente sa bulan sa Hulyo. Base sa labing lab-as nga abiso gikan sa private electric distribution utility, adunay pagsaka sa ₱0.07 kada kilowatt-hour (kWh) sa residential rate alang sa billing period sa Hulyo 2026, diin musaka ang kinatibuk-ang rate gikan sa ₱11.89 ngadto sa ₱11.96 kada kWh.
Ang pag-usab sa presyo nagsumikad sa pagsaka sa singil sa transmission charge nga muabot sa ₱0.07/kWh, tag ₱0.01/kWh sa system loss ug government taxes o mandatory charges.
Sa laing bahin, nagpabilin nga walay pagbag-o o pagsaka sa singil sa generation ug distribution charges alang sa maong bulan.
Una nang gitin-aw sa CEPALCO nga wala sila makasapi sa maong mga pass-through charge tungod kay igo ra kini nilang gipangolekta ug gipasa ngadto sa mga hingtungdan nga ahensya ug power supplier sumala sa gidemanda sa balaod.
Tungod niini, gidasig sa kompanya ang tanang konsumidor nga magpadayon sa maampingon ug husto nga paggamit sa kuryente aron malikayan ang pagdako sa bayranan.
