Gipasalig sa Cagayan de Oro City Police Office (COCPO), pinaagi ni P/Capt. Emelita Simon, nga padayon nilang pahugtan ang seguridad sa tanang tunghaan sa dakbayan.
Gipahayag ni Simon nga hugot ang koordinasyon sa kapulisan ug sa lokal nga kagamhanan aron mapugngan ang mga insidente nga nahitabo sa ubang mga dapit.
Isip kabahin sa pagpangandam alang sa “Balik Eskwela,” gipatuman na sa COCPO ang pag-deploy sa ilang mga personahe gikan sa Police Community Relations.
Kining mga opisyal gitahasan sa pagpahigayon og mga dayalogo uban sa mga administrador sa mga eskwelahan aron mailhan ang mga aspeto sa seguridad nga angay pang palig-onon.
Tumong niining inisyatibo ang pagpalig-on sa proteksyon sa mga estudyante ug ang mas paspas nga pagtubag sa ubang mga kabalaka sa komunidad. (jane abulag)
