Magpulong pa ang prosecution kung ila bang himoong hostile witness si kanhi kanhi Vice Presidential Security and Protection Group (VPSPG) Chief Colonel Raymund Dante Lachica.
Kini ang prangka nga tubag ni Prosecution Panel Spokesperson ug Adviser – Former Representative Robert Ace Barbers sa pagpangutana sa BOMBO RADYO.
Miingon si Barbers nga dili accountable nga personahe si Lachica, ug kini nagpamatuod nga ang nagsugo kaniya maoy manubag kung asa napadulong ang salapi ilabe na ang pagduda kung iya ba kining nabulsa kay walay igong ebidensya nga magpamatupd sa kalampusan sa ilang kompedensyal nga kalihukan.
Usa sa pananglitan ni Barbers ang mga gipasa nga dokumento sa Commission on Audit nga inay “purchase of information” namalit naman hinoon sa mga bangko, lamesa ug tambal ang gidapatan sa kompedensyal nga pondo.
Kini ang rason nga gusto sa COA nga ipapabalik ang mga salapi nga dili husto ang napadulngan subay sa memorandum circular sa paggasto sa Confidential funds.
