Giaprubahan sa Commission on Elections (COMELEC) ang padayon nga pagpahigayon sa unang regular nga parliamentary elections sa Bangsamoro Autonomous Region in Muslim Mindanao (BARMM) sa Setyembre 14, 2026, sumala ni COMELEC Chairman Atty. George Erwin Garcia.
Matod ni Garcia, nagpadayon ang COMELEC sa tanang preparasyon aron masiguro nga hapsay, malinawon, ug kredible ang pagpahigayon sa eleksyon sumala sa gitakdang iskedyul. Gihangyo usab niya ang tanang rehistradong botante sa BARMM nga mangandam ug gamiton ang ilang katungod sa pagbotar aron mapili ang mga miyembro sa Bangsamoro Parliament.
Samtang nagkaduol ang adlaw sa piniliay, gipakusog sa COMELEC ang koordinasyon niini sa Philippine National Police (PNP), Armed Forces of the Philippines (AFP), ug ubang mga ahensya aron mapadayon ang seguridad ug integridad sa proseso sa eleksyon.
Ang maong parliamentary elections mao ang unang regular nga piniliay alang sa Bangsamoro Parliament sukad natukod ang BARMM ubos sa Bangsamoro Organic Law.
