Nagpagawas sa bag-ong alegasyon ang mga bag-ong testigos nga gipresentar nila Attorney Levito Baligod ug kanhi Congressman Mike Defensor kalabot sa giingong paghatod sa minilyon nga kwarta nga nalambigit sa kontrobersiyal nga flood control projects.
Matod sa testigong si Jeron Valderama, nga nagpailang kanhi bodyguard ni kanhi Representative Zaldy Co, iyang nasaksihan ang paghatag sa gibanabanang 10 milyones ka pesos sulod sa usa ka hand carry bag ngadto kang Comelec Chairman George Erwin Garcia.
Hugot hinuong gilimod ug gihimakak ni Garcia ang maong mga pasangil, diin iyang gipahayag nga pulos kini bakak ug dili magka-akma ang mga pamahayag sa mga testigo.
Gawas kang Garcia, nalakip usab sa maong kontrobersiya sila si Senator Chiz Escudero ug Senator Kiko Pangilinan, lakip na ang broadcaster nga si Ramon Tulfo nga giingong duna puy nadawat nga kwarta.
Giklaro usab ni Councilor Rannie Ludovica nga ang mga media personalities ug ang mga anaa sa tag-as nga posisyon sa media organizations ang giingong nalambigit, ug dili ang mga yanong reporter nga sagad maipit lang sa sitwasyon. (riza budlao)
