Gitin-aw sa Cagayan de Oro Water District (COWD) Board Chairman nga si Dr. Gerry J. Caño nga wala pa’y mapahamtang nga pagtaas sa singil sa tubig sa dakbayan sa kasamtangan.
Atol sa ilang pagtambong sa sesyon sa City Council niadtong Hulyo 22, gitubag sa ilang management team ang mga kabaka ug pangutana sa mga konsehal bahin sa maong gikatakdang water rate increase.
Gipadayag ni Caño nga kinahanglan pa ang pormal nga kumpirmasyon ug approval gikan sa Local Water Utilities Administration (LWUA) sa dili pa kini hingpit nga maipatuman.
Posibleng karong tuiga o sa sunod pa nga tuig mahatagan og katapusan nga desisyon ug approval ang maong hangyo nga usag-usab sa rate. Gihatagan usab sa kabug-aton sa opisyal nga ang COWD usa ka service-oriented nga pampublikong pasilidad ug dili nakatutok sa panggansya lamang.
Dugang pa sa opisyal nga ang tanang dugang kinitaan nga makuha gikan sa maong pag-adjust ibalik ra gihapon sa pagpalambo ug pagpaayo sa serbisyo sa tubig alang sa mga konsumedor.
