Personal nga nakigpulong si Department of Education (DepEd) Secretary Sonny Angara sa mga magtutudlo ug personnel sa San Jose National High School sa Tacloban City aron kumustahon ang ilang kahimtang human sa nahitabo nga insidente sa eskwelahan.
Sa iyang pagbisita, iyang gisiguro ang dali nga paghatag sa psychosocial support alang sa mga magtutudlo ug kawani nga naapektuhan sa panghitabo.
Gimando niya ang pagpalihok sa mga guidance counselor aron matabangan ang mga estudyante sa pagproseso ug pag-atubang sa emosyonal nga epekto sa trahedya.
Gibutyag sa kalihim nga importante nga masiguro ang kaluwasan ug kaayohan sa mga magtutudlo, kawani, ug estudyante samtang nagpadayon ang komunidad sa eskwelahan sa pagbangon gikan sa trahedya.
