Mi-angkon si Department of Information and Communications Technology (DICT) Secretary Henry Rhoel Aguda nga wala’y gahum ang ilang ahensiya nga direktang makapapha sa mga “fake news” nga nagkalat sa social media ug online platforms.
Sa pakighinabi sa BOMBO RADYO siya miingon nga ang mga online platform mismo ang adunay community standards nga nagagamit sa Artificial Intelligence (AI) aron ma-detect ug matangtang ang mga “misinformation”.
Gibutyag ni Aguda nga anaa sa 98% sa mga fake news ang natangtang na pinaagi sa AI.
Apan, adunay pay nahibiling 2% nga makalabang sa lain-laing apps sama sa Viber ug uban pang platforms.
Kini ang problema sa social media nga gitawag niya’g “cross-pollination.”
Iyang gipamugos nga anglabing epektibong paagi mao ang pag-detect sa disinformation gikan pa sa sinugdan pinaagi sa AI sa mga platform.
Ang papel sa DICT mao lang ang pagtawag sa atensyon sa mga kumpanya ug pagpasabot nga adunay nakalusot nga content.
Human niini, ang mga platform mismo ang magdesisyon ug motangtang base sa ilang community standards.
