Gisuportahan sa Department of Energy (DOE) ang panawagan ni Presidente Ferdinand Marcos Jr. sa iyang ikalimang State of the Nation Address (SONA) nga amyendahan ang EPIRA aron matangtang ang system loss charge nga gibayran sa mga konsumidor sa kuryente.
Sa usa ka pahayag, giingon ni Energy Secretary Sharon Garin nga andam ang ahensya nga makigkoordinar sa Kongreso, Energy Regulatory Commission (ERC), ug mga sektor sa enerhiya alang sa mga reporma nga makatabang sa mga konsumidor ug makapalig-on sa power sector.
Apan gipasabot sa DOE nga kinahanglan ang husto nga balanse sa pag-amendar sa balaod aron usab mapadayon ang kasaligan ug lig-on nga suplay sa kuryente.
Matud sa ahensya, kinahanglan ipatuman ang modernisasyon sa imprastraktura, paggamit sa bag-ong teknolohiya, ug mas epektibong regulasyon aron mapakunhod ang system losses ug mapaayo ang serbisyo sa kuryente.
