CAGAYAN DE ORO CITY-Gipasalig sa Department of Health o DoH-10 nga dili angay ikabalaka ang nadiskobre nga hospital tubes nga nakit-ang gilabay sa lawod sa dagat.
Kini human unang milugwa ang report nga ang maong hospital tubes ang ginamitan sa mga pasyente nga nagbaton sa sakit nga AIDS.
Miingon si DoH-10 spokesperson Dr Dave Mendoza nga dili motakod sa mga isda ang maong sakit sukwahi sa gipakatag nga impormasyon sa pipila ka iresponsable nga tawo.
Dugang ni Mendoza nga makuha lamang sa tawo ang maong sakit pinaagi sa paghilawas,gikan sa gidonar nga dugo ug mismo sa bata nga gihimugso sa inahan nga naghambin niini.
Una nang gitawag nga fake news ang report nga dili angay mokaon sa mga isda kay natakbuyan sa kagaw gikan sa maong hospital tubes.
