Nanawagan si Justice Secretary Fredderick Vida sa mga ginikanan ug guardians nga mas tutukan ug giyahan ang ilang mga anak, ilabi na sa ilang mga kalihokan online.
Kini human sa pagpamusil sa Ateneo de Zamboanga University nga miresulta sa pagkamatay sa duha ka estudyante.
Matud ni Vida, gisusi sa mga awtoridad ang posibilidad nga adunay mga tawo nga nag-target ug nag-mentor sa mga menor de edad pinaagi sa text messages ug group chats, lakip ang posibleng pagdani kanila ngadto sa bayolenteng mga kalihokan.
Giawhag niya ang mga ginikanan nga kanunay makig-istorya sa ilang mga anak ug mahibalo sa ilang ginabuhat ug mga butang nga ilang naengkwentro online.
Matud pa ni Vida, mas nakaila ang mga ginikanan sa ilang mga anak, busa importante ang padayon nga paggiya ug pag-monitor kanila aron malikayan ang posibleng pag-apil sa mga bayolenteng kalihokan. (jane abulag)
