Dul-an 1000 ka mga armas ang nakompiskar ug natigom sa Police Regional Office 10 (PRO-10) sa ilang tunga sa tuig nga operasyon sa tibook Northern Mindanao.
Kini ang gibutyag ni PRO-10 Regional Director PBGEN Christopher Abrahano, human sila mipahigayon sa 833 loose firearmes ug anti-terrorism operation gikan Enero hangtud Hunyo.
Sa walay hunong nga operasyon nasikop ang 194 ka indibidwal ug nakasakmit ang kinatibuk-ang 921 ka nagkadaiyang klase sa armas.
Lakip sa mga gipresentar sa PRO-10 press conference mao ang 44 ka armas nga nasakmit sa RCSU 10 ug 29 ka armas gikan sa RFU-10 – gikan sa nagkalain-laing operasyon.
Sa pikas bahin, sa kampanya batok sa Communist Terrorist Groups (CTG), moabot sa 123 ka miyembro o personalidad sa grupo ang naaresto, misurender, ug na-account sa kapolisan.
Nabawi usab ang mga elemento sa PRO-10 ang 88 ka mga armas gikan sa maong rebelde nga grupo, diin 64 niini ang pormal nga gipagawas sa publiko.
Ang maong dakong kalampusan nagpakita sa makanunayong paningkamot sa kapolisan aron masiguro ang kahapsay, kalinaw, ug seguridad sa tibuok rehiyon
