Nakarekober ang Philippine National Police (PNP) ang kapin ₱10.9 milyon nga gituohang smuggled cigarettes sa tulo ka managlahi nga operasyon sa Northern Mindanao, Bangsamoro Autonomous Region, ug Zamboanga Peninsula.
Sa Kolambugan, Lanao del Norte, nadakpan ang usa ka lalaki, legal age human masanta sa checkpoint ang usa ka wing van nga nagkarga sa 190 master cases o mga 9,500 reams sa gituohang smuggled cigarettes nga gibanabana ang kantidad sa ₱7.6 milyon.
Ang sakyanan ug kargamento gibutang sa kustodiya sa kapulisan samtang naghulat sa turnover sa hustong ahensya sa gobyerno.
Sa Marantao, Lanao del Sur, nakarekober ang kapulisan sa 2,550 reams sa gituohang smuggled cigarettes nga kantidad sa ₱2.18 milyon human biyaan sa pipila ka indibidwal ang kontrabando sa kilid sa kalsada pagkahibalo nila sa anti-criminality checkpoint.
Ang mga nakuhang items gi-secure samtang nagpadayon ang follow-up investigation aron mailhan ang mga nalambigit.
Sa Pagadian City, Zamboanga del Sur, nakarekober ang kapulisan ang 20 master cases sa gituohang smuggled cigarettes nga kantidad sa ₱1.14 milyon human adunay nagreport nga mga giabandona nga kahon sa lugar.
Ang mga awtoridad nagkordinasyon sa hustong ahensya alang sa husto nga disposisyon sa mga nakuhang items ug sa padayon nga imbestigasyon.
Hisayran nga ang tolo ka mga pagsanta maoy resulta sa PNP’s Focused Agenda on Enhanced Managing Police Operations, nga nagpalig-on sa direktiba ni Presidente Ferdinand R. Marcos Jr. sa paningkamot batok sa illegal trade, pagpanalipod sa kita sa gobyerno, ug pagpatuman sa rule of law.
Gidayeg ni PNP Chief Police General Jose Melencio C. Nartatez Jr. ang mga operating units tungod sa ilang pagbantay ug paspas nga aksyon.
Gisiguro sa PNP nga magpadayon ang mga operasyon batok sa smuggling ug uban pang transnational crimes isip kabahin sa ilang komitment sa Bagong PNP para sa Bagong Pilipinas: Serbisyong Mabilis, Tapat at Nararamdaman.
