Nabalaka ang presidente sa Employers Confederation of the Philippines (ECOP) sa posibleng impak sa katawhan ug ekonomiya sa nasud sa katukuran sa Pax Silica.
Gibutyag ni Sergio Ortiz-Luis Jr., ang Presidente sa ECOP nga dili basta basta kini nga proyekto kay usa man kini ka a megaproject nga data center sa New Clark nga gilaumang mogamit sa liboan ka ektaryang yuta.
Matud pa ni Luis, bakak ang saad nga makamugna kini sa bilyun-bilyong trabaho tungod kay gamay ra man kaayo ang tawo nga gikinahanglan sa pagpadagan sa usa ka automated data center.
Nagpadayag usab sa pagduhaduha si Luis kung ngano nga dinhi sa Pilipinas pilion sa mga Amerikanong mamumuhunan ang pagtukod niini inay ngadto sa ilang kaugalingong nasod.
Gumikan niini nagtuo ang presidente sa ECOP nga posibleng magdala kini sa tensyon sa geopolitical nga aspeto tungod kay basin tan-awon kini sa China ug Russia nga sama sa usa ka military base sa US, nga mahimong hinungdan sa pag-withdraw sa ilang mga puhunan sa nasod.
Gawas niini, gipunting usab sa ekonomista ang dakong krisis sa tubig nga mahimong idulot sa proyekto tungod kay kinahanglan man og grabeng gidaghanon sa tubig ang pagpabugnaw sa mga pasilidad sa kompyuter samtang kaniit na ang suplay sa tubig sa nasod.
Tungod niining tanan nga mga isyu sa trabaho, siguridad, ug natural nga rekurso, nanawagan siya nga kinahanglang tun-an pag-ayo ug hisgotan pag-usab ang maong proyekto sa dili pa kini pinal nga ipatuman
