Gihingusgan ni Brother Wilson Amad, usa ka peace advocate ug katekista sa Simbahang Katolika, ang dakong kamahinungdanon sa pagpalambo sa maayong pamatasan pinaagi sa pag-ingon nga ang tinuod nga kasing-kasing sa edukasyon mao gayud ang edukasyon sa kasing-kasing sa usa ka indibidwal.
Sa pakighinabi sa BOMBO RADYO, iyang namatikdan nga aduna’y seryoso nga kakulang karon sa paghatag sa bili sa character formation ug ethics tungod kay mas nakatutok ang kasamtangang sistema sa tunghaan ngadto sa aspeto sa academics.
Bisan pa man kon aduna’y higayon ang simbahan nga makatudlo pinaagi sa katekesis kausa sa usa ka semana, giila kini ni Amad nga nihit ra kaayo aron mapalig-on ang pundasyon sa mga kabatan-onan.
Subay niini, iyang giduso nga dili unta kalimtan ang pagtulun-an mahitungod sa moralidad ug mga maayong hiyas nga maoy labing mahinungdanon sa pag-umol sa kinaiya sa usa ka bata.
Alang kaniya, angayan lang nga hatagan og mas dako nga pagtagad ang maong bahin tungod kay kini ang nag-unang katungdanan ug misyon sa simbahan nga maggiya sa espirituhanon ug moral nga aspeto sa katilingban
