“Lamang kaayo ni sila,” kini ang gibutyag ni CAFETADA President Bernie Jamaca sa iyang pagtandi sa mga electric taxi ug mga tradisyonal nga taxi.
Matud niya, mas ubos ang gasto sa operasyon sa mga electric taxi tungod kay kuryente ang gigamit niini sa pag-charge, samtang ang mga tradisyonal nga taxi nagsalig sa gasolina ug krudo nga padayon ang pagsaka sa presyo.
Bisan pa niini, giingon niya nga andam ug adunay kapasidad ang mga lokal nga taxi operator sa pagpadagan usab og mga electric taxi.
Apan, iyang gipangutana nganong gihatagan og oportunidad ang mga langyaw nga operator bisan andam ug kaya usab kini sa mga lokal nga operator.
Matud pa niya, mao kini ang usa sa mga nag-unang kabalaka sa lokal nga industriya sa taxi. (jane abulag)
