Normal lang nga adunay mga diskusyon ug pagbinayloay sa opinyon tali sa Prosecution Team ug Defense Team atol sa pre-trial conference.
Kini ang gibutyag ni Senate Secretary Renato Bantug Jr. sa prensa human nagtagbo karong buntag ang duha ka panig sa senado.
Gipamugos ni Bantug nga wala’y laing espesyal nga nahitabo gawas sa kasagarang debate ug interaksyon nga kabahin sa proseso.
Kini ang rason nga siya mitubag nga “nothing out of the ordinary” ang engkwentro sa managlahing kampo.
Una niini, gihupay ni Banug ang kabalaka sa press nga adunay lalis sa prosecution ug defense team, ug miingon nga walay seryosong panagbangi o irregularidad nga nahitabo.
Hisayran nga ang tumong sa pre-trial conference mao ang paghan-ay sa mga isyu ug pag-andam sa mga lakang aron hapsay ang pagsugod sa pormal nga paghearing o impeachment trial sa Hulyo 6.
Human sa conference, magsugod na ang pag-draft sa pre-trial order nga mao’y maglatid sa daloy sa kaso.
