CAGAYAN DE ORO CITY – Gilusad sa kapolisan ang lapad nga operasyon batok sa mga suspek nga dunay kalabutan sa pagpusil-patay sa kanhi municipal mayor duol sa munisipyo sa Brgy Oriental Beta,Lumbaca Unayan,Lanao del Sur.
Kini human unang gimando ni Lanao del Sur Police Provincial Office Director Col. Robert Daculan ang pagsulbad sa kamatayon sa biktima nga si Abdulazis Tadua Aloyodan, 60 anyos nga bana ni incumbent Lumbaca Unayan Mayor Jamalia Dimatunday Aloyodan.
Sa pasiunang imbestigasyon, igo lang nagtindog ang biktima atubangan sa ilang balay dihang gilusob sa mga suspek nga sakay sa kolor puti nga pick-up kagahapon sa buntag.
Nahiagom sa daghang igo pinusilan ang biktima gikan sa gitoohang tag-as nga kalibre sa armas hinungdan sa kamatayon niini.
Gidala pa sa klinika sa lungsod sa Malabang ang biktima apan deklarado nang patay sa iyang paghidangat.
Sa pagkutlo ning balita, wala pa’y gilugwa nga impormasyon ang kapolisan kung unsa ang motibo sa pagpamusil.
Narekober sa crime scene ang mga basiyo sa kalibre 7.62 ug unom usab gikan sa 5.56 caliber.
Dumduman nga sa tuig 2020, gi-ambush usab ang mayor kaniadto sa maong lungsod nga si Somerado Guro dihang miagi sa Zone 2,Brgy Iponan, Cagayan de Oro City apan naintimano pagka-igo iyang asawa nga si Rohaifa Guro rason wala natabang sa mga mananambal niadtong tungura.
Namahayag kaniadto si Cagayan de Oro City Police Office spokesperson Lt Col. Evan Viñas nga anggulo sa rido,politika ug negosyo ang gitutukan sa imbestigasyon sa gidangatan sa magtiayong Guro nga gikan sa Bloomingdale Subdivision ug pabalik na sa Lanao del Sur dihang gipangbanhigan.
