Mihangyo ang mga House prosecutors sa mas paspas nga proseso sa pagmarka sa mga dokumentong ebidensya sa impeachment case batok kang Bise Presidente Sara Duterte aron masunod ang gitakdang hearing sa Hulyo 6.
Gibutyag ni House impeachment lead prosecutor Atty. Gerville “Jinky” Luistro ug House prosecutor Joel Chua, daghan ang mga dokumento nga may kalabotan sa isyu sa confidential funds.
Gibanabana nga anaa sa 1,900 ka dokumento gikan sa Department of Education ug labaw pa sa 2,000 gikan sa Office of the Vice President ang kinahanglan markahan.
Gisulti ni Luistro nga upat ka grupo ang nagtrabaho karon sa pagmarka sa mga ebidensya, apan adunay kabalaka kung mahuman ba kini sa gihatag nga oras.
Tungod niini, gitan-aw sa prosecution panel ang posibilidad nga dugangan pa ang mga grupo ug gamiton ang Biyernes ug Sabado alang sa proseso, kung tugotan sa Senado.
Gawas sa pagmarka sa ebidensya, gihisgutan usab sa panel ang ubang isyu nga may kalabotan sa pagpangandam para sa impeachment trial.
Samtang, kumpiyansa ang panel nga pagatugotan sila sa ilang hangyo.
Miingon Manila Rep. Joel Chua, positibo sila nga madungog ang ilang request nga extension sa upat ka adlaw hangtod Sabado ug ang pagdugang sa mga teams nga nagmarka sa mga dokumento sa ebidensya.
