Gisugdan sa mga trabahante sa National Park Service ang pagbubo og ‘hydrogen peroxide’ sa Lincoln Memorial Reflecting Pool didto sa Washington D.C. aron sumpoon ang paspas nga pagdaghan sa ‘algae’ kon lumot.
Nahitabo kini kapin lang sa usa ka semana human gipintalan pag-usab ang maong makasaysayanong pool isip kabahin sa kampanya ni Presidente Donald Trump sa pagpanindot sa mga monumento sa maong dapit.
Gawas sa ‘hydrogen peroxide’, gigamit usab sa Department of the Interior ang gitawag nga ‘nanobubble ozone technology’ nga mas luwas kay sa ‘chlorine’ aron pamatyon ang mga kontaminante sama sa bakterya nga ‘E.coli’.
Sumala ni Professor Christopher Gobler, usa ka eksperto sa ‘algae’, kini nga pamaagi kay epektibo ug dali nga solusyon nga dili makadaot sa mga itik ug gansa nga kanunay nagpuyo sa maong pool.
Bisan pa niana, gipahayag ni Gobler nga temporaryo lang kini nga solusyon tungod kay dako ang purohan nga mobalik ra gihapon ang pagdaghan sa mga lumot sa umaabot nga mga adlaw.
