CAGAYAN DE ORO CITY-Nagtoo ang Integrated Bar of the Philippines IBP Misamis Oriental -Cagayan de Oro chapter nga adunay ikasukol si Sen Antonio Trillanes IV sa pag-revoke ni Pres Rodrigo Duterte sa iyang amnesty.
Matud ni IBP Misamis Oriental-Cagayan de Oro chapter president Attty. Eddie Cuaresma nga maggamit ni Trillanes ang footage nga iyang gi-presenta sa senado aron mapakigbatukan ang Proclamation 572 ni Pres Duterte.
Nagduda si Cuaresma sa kalit nga pagkawala sa application form ni Sen Trillanes sa Deparment of National Defense.
Siya miingon nga imposible nga makakuha sa amnesty certificate si Trillanes kung wala kini mag-apply.
Dugtong niini, gihagit ni Cuaresma ang mga personahe sa DND nga pangitaon ang maong mga dokumento aron dili magduda ang publiko.
Gitin-aw usab ni Cuaresma nga ang Korte Suprema lamang ang bugtong makahukom kung mahinayon ang pag-revoke sa amnesty.
Kini pinaagi sa himoong pagdungog sa proclamation 572 ni Pres Duterte.
Naglaum si Cuaresma nga ‘factual finding’ ang himoong pagdungog sa korte ilabina nga nagtoo siya nga politically motivated ang pag-revoke sa amnesty ni Trillanes.
