Dakung bakak, ug gikataw-an lang sa senate impeachment courts ang mikatag nga report nga nangumbinsir si Senate Presiding Judge Francis Chiz Escudero sa iyang mga kaubang senador nga makombikto sa upat ka artikulo sa impeachment si Bise President Sara Duterte.
Sa pakighinabi sa BOMBO RADYO, mitin-aw si Atty Reginald Tongol nga “totally unverified” ug walay kamatuoran ang mga akusasyon batok sa Senate Impeachment Court Presiding Officer.
Matud sa spokesperson sa impeachment court, mismong si Escudero ang nagpamatuod nga walay bisan unsang gihimong lihok ang iyang liderato aron malikayan nga maka-impluwensya sa ubang mga senator-judges.
Gipasabot ni Tongol nga nagpabilin nga busy ug nakapokus ang Presiding Officer sa pagtuon ug pagbasa sa daghang dokumento sa kaso.
Gihatagag igsaktong pagtagad sa Presiding Officer ang mga testimonya sa mga saksi ug ang mga resolusyon nga kinahanglang ipagawas sa korte.
Dugang pa niini, dako nga oras ang gibubo sa pagproseso sa mga kinahanglang aksyon tungod sa mga nakanselar nga trial dates. Gipadangat sa korte nga mas gipili sa Presiding Officer ang pagtrabaho sa legal nga aspeto sa impeachment inay sa pagsawsaw sa mga politikanhong isyu.
