Nagtoo ang Philippine Coast Guard (PCG) nga ang taas nga kasayuran sa katawhan sa soberanya sa Pilipinas ug sa isyu sa West Philippine Sea maoy labing importante nga legasiya nga mabilin sa mga katigulangan alang sa mga bag-ong tubo.
Kini ang gibutyag ni PCG Spokesperson to the West Philippine Sea Commodore Jay Art Tarriela human iyang gidepensa nga ang isyu sa atong kadagatan dili lamang usa ka lokal nga hisgutanan alang sa mga residente sa Maynila, Palawan, o Zambales.
Kinahanglan malambigit niini ang mga katawhan usab sa Mindanao.
Mipasabot si Tarriela nga nagkinahanglan sa hiniusang pagbarog sa tanang mga Pilipino gikan sa Luzon, Visayas, ug Mindanao, kay ang West Philippine Sea dili lang usab usa ka heyograpikanhong teritoryo kundili nagsimbolo sa labing pinalangga nga kaliwatang Pilipino.
