Nagpagawas na sa pormal nga pahayag ang Iglesia ni Cristo (INC) kalabot sa nagkadool nga pagsikop kang Senador Rodante Marcoleta.
Namahayag si INC Spokesperson Bro. Edwil Zabala nga ang kalit nga interfaith rally sa ilang mga miyembro sa EDSA, maoy ilang tubag sa sa hulga nga arestrohon ang senador.
Gitataw sa grupo nga wala sila misupak sa pagpatuman sa balaod, apan hugot nilang gikondinar ang pagbalit-ad sa isyu, ilabi na kung ang iyang pagkasikop gigamit lang aron tabunan ang korapsyon.
Gibutyag ni Zabala nga ila ang ngalan ni Senador Marcoleta tungod sa iyang pagpangulo sa imbestigasyon sa pinakalapad nga klase sa pagpangawat sa kasaysayan sa nasod samtang siya pa ang chairman sa Senate Blue Ribbon Committee.
Bisan pa man sa kausaban sa pamunuan sa komite, gipadayon gihapon sa senador ang iyang tinguha sa pagpangita sa hustisya alang sa mga ordinaryong lungsoranon.
Tungod niini, gikatingad-an sa INC kon nganong ang nagbutyag sa kamatuoran mao man hinuon ang gikasohan sa plunder ug gitinguhang prisohon nga wala’y piyansa.
Gipasabot sa simbahan nga ang nadawat ni Marcoleta kaniadto usa lamang ka campaign donation ug duna na gani desisyon ang Comelec nga nag-ingong wala’y kalapasan kalabot niini.
Dako ang ilang suporta sa senador tungod kay nagkahiusa ang ilang baruganan alang sa kamatuoran, tulubagon, ug hustisya.
Bisan pa’g mapriso si Marcoleta, nanumpa ang ilang pundok nga dili sila moundang sa pagpangayo sa kaangayan alang sa mga nabiktima sa pagpangawat sa panudlanan sa nasod.
Gitapos ni Zabala ang opisyal nga baruganan sa INC pinaagi sa pagpadumdum sa mga hingtungdan nga ang “pinili nga hustisya” o selective justice” usa ka matang sa inhustisya ug dili sila magpakahilom niining dakong pagyatak sa balaod.
