CAGAYAN DE ORO CITY – Supakon sa nagkadaiyang kasimbahanan nga ubos sa interfaith group ang gikabalak-an nga posibleng pagpribado sa Cagayan de Oro Water District o COWD ning syudad.
Kini ang rason nga naglugwa sila sa ecumenical pastoral statement aron ipadayag ang mga punto kabahin sa giatubang nga krisis sa panubig sa dakbayan.
Namahayag si Iglesia Filipina Independiente Social Advocate Chairman Fr. Jefferson Palasan nga kanunay’ng giila sa interfaith nga batakang serbisyo ang panubig ug dili angay mahikaw sa katawhan.
Kini tungod kay nagtoo sila nga natural ang tinubdan niini ug dili angay magamit sa naghinobrang pagpaginansya sa pipila ka mga kapitalista ug bisan sa pagsakay sa isyu sa politika.
Hisayrang ang COWD ubos sa Local Water Utilities Administration o LWUA takeover tungod sa obligasyong suliran tali ngadto sa Cagayan de Oro Bulk Water Incporated o COBI.
