Hugot nga gikondenar sa International League of Peoples’ Struggles Philippines (ILPS) ang nagpadayon nga internasyonal nga tensyon tali sa Estados Unidos, Israel ug Iran.
Sa interbyu sa Bombo Radyo namahayag si Arnold Padilla, spokesperson sa ILPS Philippines, nga dili lamang kini paglapas sa soberanya sa Iran kondili usa usab ka pag-atake sa katungod sa mga Iranians sa ilang self-determination.
Gikabalaka usab sa ILPS ang kahimtang sa mga sibilyan sa mga apektadong rehiyon sa Middle East, ilabi na ang mga overseas Filipino workers nga nadestino sa maong lugar.
Matud pa ni Padilla, ang paglala sa tensyon mahimong mosangpot sa mas dakong kagubot nga direktang makaapekto sa kaluwasan sa mga katawhan.
Gipasabot usab sa grupo ang halapad nga epekto sa maong tensyon dili lamang sa Middle East kondili sa tibuok kalibutan, lakip na sa ekonomiya sa gagmay nga mga nasud sama sa Pilipinas.
Sumala sa ILPS, kasagaran maapektuhan ang Pilipinas sa matag internasyonal nga konflikto, ilabi na sa aspeto sa ekonomiya ug panginabuhian sa katawhan.
