Bug-at nga hagit ang gipalanog ni Santo Papa Leon sa mga kabatan-unan, magtutungha ug sa tanan magtutudlo sa pagselebrar sa Jubilee of the World of Education.
Kagahapon, gibana-bana nga muabot sa 250,000 ang partisipante gikan sa managlahing unibersidad sa Europa, Amerika ug Asya ang mitambong sa jubilee.
Sa espesyal nga mensahe sa Santo Papa, mi-igon si Santo Papa Leon nga mabungahon lamang ang pagtudlo kung aduna kini sagol nga paghigugma.
Iya usab gihagit ang mga batan-on nga magmugna sa kalibutan pinaagi sa edukasyon aron mas mahimo pang maayo ang pagpuyo sa kalibutan, layo sa kagubot, kasina, ug pagbahin-bahin.
Hisayran nga ang Jubilee of the World of Education usa ka espesyal nga kalihokan nga gipasiugdahan sa Simbahan aron sa pagselebrar ug pagpasigarbo sa papel sa edukasyon isip tinubdan sa paglaum ug kalinaw.
Kini usa ka panahon sa grasya ug pagbag-o, diin ang mga magtutudlo, estudyante, ug mga edukador gidasig nga ilhon ang katahum ug responsibilidad sa pagtudlo, dili lang sa paghatag sa kahibalo, apan sa pag-amuma sa kasingkasing ug espiritu sa mga kabatan-onan.
