CAGAYAN DE ORO CITY, Philippines- Misaka pa sa kapin P3-Milyon ang kadaut sa power transmission lines epekto sa Super Typhoon Carina ug daghang ulan nga dala sa Habagat sa sa Luzon Grid.
Subay sa report sa National Electrification Administration (NEA) miabot sa P3,142,720.91 ang inisyal nga kantidad sa kadaot sa mga pasilidad sa mga electric cooperatives tungod sa pagkaguba sa ilang mga poste ug pagkaputol sa ilang mga kable.
Base sa ‘JULY-25 DATA’ sa NEA, natala ang labing daku nga kadaut sa Central Pangasinan Electric Cooperative (CENPELCO), Benguet Electric Cooperative (BENECO), Mountain Province Electric Cooperative (MOPRECO), Zambales II Electric Cooperative (ZAMECO II), ug Occidental Mindoro Electric Cooperative (OMECO)
Anaa sa 114,565 konsumidor ang naapektuhan.
Hinoon, mibalik na ang sugang dagitab sa 82.23% kon 236 gikan sa 287 lungsod, nga unang naapektuhan sa power interruptions.
Samtang ang nahibilin nga 34 ka lugar ang padayong gitrabaho.
Mikabat sa siyam ka electric cooperatives ang nakasinati sa partial power interruption lakip na ang Central Pangasinan Electric Cooperative, Ilocos Norte Electric Cooperative, Benguet Electric Cooperative, Mountain Province Electric Cooperative, Abra Electric Cooperative, Zambales II Electric Cooperative, Peninsula Electric Cooperative, Tarlac I Electric Cooperative ug Occidental Mindoro Electric Cooperative.
