Gikumpirma sa Department of Justice (DOJ) nga ipailalom na sa regular nga preliminary investigation ang 15-anyos nga estudyante nga giilang “child in conflict with the law” (CICL) human sa nahitabong pagpamusil sa usa ka tunghaan sa Tacloban City.
Kini human pormal nga gipasaka batok kaniya ang tulo ka ihap sa kasong murder ug duha ka ihap sa attempted murder atol sa inquest proceedings nga gipahigayon sa Tacloban City Prosecutor’s Office.
Ang maong suspek kasamtangang anaa sa kustodiya sa Regional Rehabilitation Center for Youth sa Region VIII, samtang ang laing 14-anyos nga kauban niini gipailalom usab sa intervention program sa DSWD.
Sa pagkakaron, nagpadayon ang legal nga proseso dungan sa pagtabang sa DOJ sa pamilya sa tulo nga namatay ug tulo nga naluwas aron makadawat og financial assistance gikan sa Board of Claims.
