CAGAYAN DE ORO CITY – Imbestigaran sa konseho ang pipila ka kapalpakan sa bag-uhay lamang natigayon nga koronasyon sa Ms Cagayan de Oro alayon sa kapistan ni Sr San Agustin sa syudad sa miaging Agosto ning tuiga.
Kini human tukia ni Konsehal Edgar Cabanlas ang kapas sa production team sa maong indigay sa kaanyag diin tipik sa nabantayan niini ang sobra kayabag sa pipila ka pageant singers nga miharana sa mga kandidata sa koronasyon sa Atrium,Limketkai Mall sa milabay’ng gabii sa petsa 27 sa Agosto.
Gikuwestiyon usab niini ang pagbaton sa tulo ka winners nga gilangkuban sa Ms CdeO-Universe,Ms CdeO Bb Pilipinas ug Ms CdeO Mutya ng Pilipinas.
Siya miingon nga hulaton niya nga masugdan ang imbestigasyon niini kay kon dili sila matagbaw sa pag-esplikar sa private organizer,ipabalik nila ang pagdumala niini sa dakbayan aron kalikayan ang paghinobra sa komersyal.
Dugtong niini,uyon si city tourism committtee chairman Kag Jay Pascual nga mohimo’g imbestigasyon kabahin sa pipila ka kakulangon sa bag-uhay natapos nga Ms Cagayan de Oro ning tuiga.
Miingon si Pascual nga mismo ang organizers lamang ang nasayod sa pageant flow ug igo ra kini mohatag sa suporta kon dunay iyang angayang matabang.
Dugang sa konsehal nga mas maayo nga mapatawag si Ms CdeO organizer Mags Cue aron mabati ang panig niini ug makahimo’g mga kabag-uhan sa mga mosunod nga kalihukan sa kapistahan sa dakbayan.
