CAGAYAN DE ORO CITY – Gilauman ang lig-ong political line up sa bando ni City Mayor Rolando ‘Klarex’ Uy nunot sa iyang subli pagpapili sa syudad sa 2025 elections.
Kini human tubaga ni Cagayan de Oro District 2 Cong. Rufus Rodriguez ang unang gipasigarbo ni Uy nga nagkahiusa na ang ilang puwersa sa sunod nga eleksyon.
Namahayag si Rodriguez kinsa igsoon ni City Vice Mayor Jocelyn ‘Bebot’ Rodriguez nga ubos sa pagdumala ni Klarex,giingong anaa sa maayong kahimtang ang dakbayan.
Ang magsoong Cong Rodriguez ug Vice Mayor Bebot ang kanhi kaatbang sa bando ni Klarex kay si kanhi Phividec administrator Jose Gabriel ‘Pompee’ La Viña ang ilang kandidato sa pagka-mayor ubos sa alyansa sa partido Padayon Pilipino-Centrist Democratic Party ug Bag-ong Cagayan.
Samtang nahatagan na sa kahupayan ang hugon-hugon ug kabalaka sa political supporters niUy nunot sa iyang unang gibandilyo nga naghiusa’g puwersa na sila sa politika ni Rodriguez.
Kini human nagdumili ug naglikay pa si Rodriguez sa pagkomento dihang unang gipahibalo sa mayor sa iyang binayran nga programa sa radyo ang naporma nila nga alyansang-politika.
Namahayag si Uy nga taud-taod na nila nasabutan ni Rodriguez ang maong political alignment apan nasayo ang pagpahibalo niini sa publiko.
Gilabtikan usab niya ang isyu sa ayuda sa kanhi administrasyon nga inay ihatag sa naglisod nga katawhan sa dakbayan apan gidala na hinoon ug didto gipanghatag sa Misamis Oriental.
Samtang gitawag ni kanhi City Mayor Atty. Oscar Moreno nga ‘worse mayor’ si Klarex sa kasaysayan sa dakbayan.
Kini ang rason nga naikag si Moreno nga subling modagan pagka-mayor aron ibalik kon unsa ang estado ug dignidad nga dugay’ng nahuptan sa katawhan sa syudad.
Gitulisok sa kanhi mayor ang kanunay’ng langan nga paghatag suhulan sa mga empleyado ug kulang nga pag-atiman sa mga basura sa dakbayan.
Namugos si Moreno nga dili na unta kini mobalik sa politika kay nahatag na niini ang taas niya nga panahon sa serbisyo-publiko apan giingong mapugos siya pag-atbang kang Klarex kay nahinugon sa kahimtang sa dakbayan.(Picture:Kim Zaldivar)
