CAGAYAN DE ORO CITY – Gipasalig ni Pres Bongbong Marcos nga ipadayon ang pagbubo sa dugang kalambuan sa Northern Mindanao nunot sa pagpirmahay na sa Laguindingan International Airport Public-Private Partnership o PPP Concession Agreement sa Malakanyang ning adlawa.
Namahayag si Marcos nga nagdagan pa lang daw kini pagka-senador,gisugdan na ang pag-lobby niini aron mahimong international airport hangtod nga nahatagan sa katumanan.
Gitumbok sa presidente ang mga paningkamot ni kanhi gobernador nga karon Misamis Oriental 2nd District Cong. Bambi Emano,kinuyugan ni 1st District Cong. Christian Unabia ingon man ni Cagayan de Oro District 1 Cong. Lordan Suan nga imbitado usab sa paglagda sa kasabutan kaganihang buntag.
Siya miingon nga ang pagkapirmahi sa P12.75-B PPP ang dayag nga lakang alang sa katumanan sa tahas nga mapalambo pa ang mga tugpahanan ug mga pasilidad niini sa Pilipinas.
Maoy nagkapirmahay sa PPP ang Department of Transportation ug Aboitiz InfraCapital nga nagtinguha madumala una nga pribado ang tugpahanan nga mag-target sa 3.9 ngadto sa 6.3 milyones ka pasahero sa duha ka phases.
Hisayrang kasamtangang anaa lang sa 1.6 milyones ka pasahero ang kaya sa Laguidingan aiport tungod sa kagamay sa espasyo ug pulos local flights lang ang anaa niini sukad natukod.
