Gisaway ni lead defense lawyer Atty. Sheila Sison si private prosecutor Atty. Amando Ligutan tungod sa post niini sa social media nga nag-ingon nga gidili ang “misleading questions” sa cross-examination.
Giklaro usab ni Sison nga dili misleading questions ang gipasabot ni defense lawyer Atty. Kristine Ferrer nga ‘allowed’, kon dili ang mga leading questions o mga tubag nga “yes” o “no” sa mga pangutana.
Gipadayag usab ni Sison nga ang maong pag-post nakalapas sa Rule 18 sa impeachment court nga nagdili sa mga abogado sa pagkomento bahin sa merito sa kaso samtang nagpadayon ang pagdungog.
Tunga-tunga sa maong kontrobersiya, nagdumili sa pagpalabay sa isyu si Presiding Officer Chiz Escudero ug mipahibalo nga magpagawas siya og opisyal nga order ug ruling bahin sa social media posts sa mga abogado sa sunod nga adlaw sa impeachment trial. (riza budlao)
