Giklaro sa PN Roa Canitoan Transport Cooperative o PONTRANSCO nga dili sila ang naghimo sa bag-ong Local Public Transport Route Plan o route rationalization sa syudad.
Sumala kang Luzminda R. Escobidal sa PONTRANSCO, ang City Government sa Cagayan de Oro maoy naghimo sa maong plano sa mga ruta, samtang ang ilang kooperatiba mituman lamang sa mandato niini atol sa gipahigayon nga dry run. Gisugyot sa PONTRANSCO ang pagpatuman sa usa ka one common corridor ug ang pagpalig-on sa information campaign alang sa mga pasahero ug drayber aron malikayan ang kalibog sa bag-ong sistema sa mga ruta.
Matud pa ni Escobidal, usa sa labing dakong hagit sa implementasyon mao ang pagtabang sa mga pasahero, ilabina sa mga senior citizen nga dili pamilyar sa paggamit sa social media ug YouTube aron masabtan ang bag-ong sistema sa mga ruta. (JANE ABULAG)
