Nagplano ang Land Transportation Franchising and Regulatory Board (LTFRB) Region 10 nga mopahigayon og diyalogo tali sa mga Local Government Units (LGU), mga mayor, ug mga kooperatiba sa bus aron matubag ang mga pampublikong mulo bahin sa transportasyon sa syudad.
Sa interbyu sa BOMBO RADYO miingon si LTFRB Region 10 Regional Director Aljo Bendijo nga andam sila nga mohatag sa special permit alang sa mga rota padulong sa mga malls sama sa SM City, Gasano ug uban pa aron matabangan ang mga sumasakay nga apektado sa bag-ong mga lagda.
Gipasabot sa direktor nga kinahanglang makig-alayon gihapon ang mga kompanya sa transportasyon sa taga LGU tungod kay gipatuman man ang Local Public Transport Route Plan (LPTRP) aron maminusan ang kabug-at sa trapiko sa Cagayan de Oro.
Nasabtan sa opisyal ang sitwasyon sa publiko sa kasamtangang adjustment period, ug naglaum siya nga makakaplag og maayong solusyon ang tanang nalambigit nga sector.
Aron mas mapasayon ang biyahe sa mga komyuter, nagplano usab kini nga mosulat ngadto ka Mayor Rolando “Klarex” Uy bahin sa posibilidad sa pagpatuman sa libreng sakay padulong sa sentro sa syudad
