Nanawagan sila House Deputy Speaker Rep. Paolo Ortega ug Lanao del Sur Rep. Zia Alonto Adiong sa Senado nga tugotan nga magpadayon ang impeachment trial batok kang Bise Presidente Sara Duterte aron mapresentar ang tanang ebidensya ug masayran sa publiko ang kamatuoran.
Sumala kang Ortega, ang impeachment usa ka proseso nga gitakda sa Konstitusyon aron masusi ang mga pasangil batok sa mga hataas nga opisyal sa gobyerno pinaagi sa ebidensya ug due process.
Iyang gipamugos nga bisan unsang lakang nga mopugong sa hearing sa wala pa maipresentar ang mga ebidensya makapahikaw sa katawhan sa kahigayunan nga masayran ang tibuok kamatuoran.
Gisulti usab ni Ortega nga andam na ang House prosecution panel nga ipresentar ang kaso sa Senado isip impeachment court ug igasalig niini ang desisyon sa hukmanan base sa balaod ug mga ebidensyang ipresentar.
Gibutyag usab ni Adiong nga klaro sa Konstitusyon nga katungdanan sa Senado ang paglilitis ug pagdesisyon sa mga kaso sa impeachment, busa kinahanglan una nga maipresentar ang mga ebidensya ug mga testigo sa duha ka panig.
Gisulti pa niya nga giila na sa kampo ni Duterte ang hurisdiksyon sa impeachment court sa dihang nagsumite kini og mga pleadings, busa kinahanglan nga tubagon niini ang mga pasangil imbes nga magsalig sa mga teknikal nga isyu.
Una niini, gipamugos ni Adiong nga igo na ang bisan usa ka artikulo sa impeachment aron mapahawa sa puwesto ang usa ka opisyal, sumala sa Konstitusyon
