CAGAYAN DE ORO CITY – Kakasuhan ng frustrated homicide at direct assault ang magtiyuhin na sina Amado at Sanieboy Malapad matapos nilang saksakin gamit ang icepick si Corporal Marlon Tolang, intelligence officer ng COCPO, habang nagpa-patrol sa Carmen Bridge.
Ayon kay Police Major Emilita Simon, malubha ang insidente at kasalukuyang iniimbestigahan ng kapulisan. Nagtamo ng seryosong sugat ang biktima na agad na isinugod sa ospital para sa agarang gamutan.
Giit ng awtoridad, hindi katanggap-tanggap ang naturang pag-atake lalo na’t target nito ay isang alagad ng batas na gumaganap ng tungkulin. Patuloy na tinutugis ang mga suspek upang masampahan ng kaukulang kaso at mapanagot sa batas.
Nanawagan din ang kapulisan sa publiko na makipagtulungan at magbigay ng impormasyon upang mapabilis ang imbestigasyon at mapanatili ang kapayapaan sa lungsod.
