CAGAYAN DE ORO CITY – Dili kumbinsido ang law professor sa Xavier University nga si kanhi City Mayor Oscar Moreno nga nagka-kunsabo si Pres Bongbong Marcos ug ang taga- International Criminal Court o ICC aron dakpon si former Pres. Rodrigo Duterte.
Kini human unang nanglugwa ang espekulasyon nga sinabutan sa Malakanyang ug ICC ang paggawas sa arrest order batok Duterte aron mapiangan ang bisan unsa nga planong politikanhon niini sa nasud.
Siya miingon nga tinood nga wala na’y hurisdiksyon ang ICC sa Pilipinas apan pabiling anaa pa ang obligasyon sa gobierno sa pagsanong sa mga lakang nga hinimuan sa International Police o InterPol.
Namahayag si Moreno nga dili makabalibad ang Pilipinas sa InterPol kay peligro man nga wala na’y makuhang suporta kung dili aksyonan ang pagdangop sa ICC.
Una nang namahayag sa makadaghang higayon si Marcos nga dili na mosanong ang Pilipinas sa ICC apan pinaagi lang sa usa ka hangyo sa Interpol,gitugtan ang pag-aresto kang Duterte aron ipaatubang sa crime against humanity case didto sa Netherlands.
