Wala nabalaka si Presidente Ferdinand Marcos Jr. sa mga survey nga nagpakita og mas taas nga trust rating ni Vice President Sara Duterte kumpara kaniya.
Matod ni Marcos, dili niya usbon ang iyang mga desisyon o direksyon sa pagdumala sa nasod tungod lamang sa resulta sa mga survey.
Miingon siya nga iyang mga desisyon ug polisiya gibase sa iyang pagtuo kung unsa ang husto ug labing maayo alang sa gobyerno.
Giila usab sa Presidente nga importante gihapon ang survey isip politiko, apan matud niya, dili kini dakong impluwensya sa iyang trabaho ug dali ra siyang mobalik sa iyang mga buluhaton.
Dugtong niini nagtuo si Marcos Jr. nga mobalik ang pagsalig sa mga investor sa Pilipinas tungod sa mga lakang sa iyang administrasyon batok sa korapsyon, lakip ang pag-atubang sa giingong anomalya sa flood control.
Matod ni Marcos, ang maong mga lakang aron mapanubag ang mga nalambigit sa maong eskandalo makatabang sa pagpakalma sa kabalaka sa mga investor nga gustong mamuhunan sa nasod.
Bisan pa sa iyang pag-ila nga makadismaya ang kasamtangang growth rate tungod sa energy crisis, naglaum si Marcos nga mobalik ang investor confidence sa Pilipinas ug sa tibuok kalibotan kung mahuman na ang maong krisis. (riza budlao)
