Gitataw sa House prosecution panel nga ang hangyo sa depensa alang sa “separate marking” sa mga dokumento ang nag-unang hinungdan nga miabot sa lima ka adlaw ang pagmarka sa ebidensya sa impeachment ni Bise Presidente Sara Duterte, nga orihinal untang gitakda og duha ka adlaw lang.
Aron malikayan ang dugang langan tungod sa mga komon nga testigo sa matag kampo, gisugyot ni Manila Representative Joel Chua nga ipailawom na lang kini sa cross-examination imbis nga ipaatubang pa pag-usab sa pikas nga parte.
Gibutyag usab sa panel nga wala pa gihapon silay detalye sa sulod sa mga Income Tax Return (ITR) gikan sa BIR nga anaa sa kustodiya sa Kamara kay nagdesisyon ang mayorya sa Committee on Justice nga dili pa kini pwedeng ablihan base sa balaod.
Gawas niini, gipasiugda sa panel nga importante kaayong mailhan kon tinuod ba nga tawo si Mary Grace Piattos, kinsa nakapangalan sa mga resibo sa Confidential Funds sa OVP, aron dili na mabitin ang pagpa-uswag sa impeachment trial.
